Ég er ákaflega stolt að kynna úrslitin í hönnunarsamkeppninni sem ég stóð fyrir í tilefni þess að Sameinuðu þjóðirnar tilnefndu árið 2026 sem ár kvenbóndans. Vinningshafar voru kynntir og verðlaunaðir við hátíðlega athöfn laugardaginn 20. júní. 

Ég var svo ánægð yfir þátttökunni og úrslitunum. TUTTUGU-OG-FJÓRAR peysur bárust í keppnina frá 12 prjónurum, já, sumir sendu fleiri en eina peysu :-) og peysurnar voru fjölbreyttar og fallegar og mig langar að prjóna þær allar. Sögurnar sem fylgdu voru líka djúpt hugsaðar og sýndu innsýn í líf kvenbænda á Íslandi.

Hér eru myndir af vinningspeysunum.

Fyrst er það vinningspeysan. Hönnuð og prjónuð af Helgu Linnet. Nafn peysunnar er Í uppsveitum. Hún er með kaðla að framan og hnappa bæði á ermum og í kraganum. Ef hnapparnir eru losaðir á kraganum verður peysan með fallegt og sparilegt útlit og ef kuldi sækir að, má hneppa upp aftur og fá hlýju við hálsinn. Ermunum má hneppa upp að olnboga og þá er mögulegt að vaða í hverskyns óhreinindaverk, eins og til dæmis að hjálpa kind að bera. Þessi orð fylgdu útskýringum hönnuðarins. :-)

Falleg, stílhrein og fjölnota peysa.

Í öðru sæti og einnig valin best af áhorfendum er peysan Þjóðblóm, prjónuð og hönnuð af Báru Gunnarsdóttur. Blómin á peysunni vísa til blómanna sem eru á íslenska skautbúningnum og hnapparnir við axlirnar eiga tilvísun í gullnæluna sem notuð er með búningnum. Gyllta garnið handlitaði hönnuðurinn sjálf.

Í þriðja sæti var Kartöflupeysan, hönnuð og prjónuð af Valgerði Garðarsdóttur. Lýsingin á hugmyndinni var í bundnu máli þar sem styrk og þrautseigju kartöflunnar var líkt við kvenbændur.

Síðast en ekki síst var peysa hönnuð og prjónuð af Ragnheiði Guðmundsdóttur og nefnist Vatn í leysingum. Peysan líkir eftir því hvernig vatn flæðir um þegar snjó og ísa leysir að vori. Þessi peysa var valin frumlegasta peysan af dómarateyminu.

Dómarar voru þrjár konur, þær Hildur Sveinsdóttir, Laufey Haraldsdóttir og Sigrún Helga Indriðadóttir. Þær voru ekki öfundsverðar að finna út hvaða peysur ættu að bera sigur úr býtum, en þær stóðu sig ljómandi vel.

Mig langar að óska öllum hönnuðunum til hamingju með fallegu peysurnar þeirra. Vel gert! Og vinningshöfum fyrir framúrskarandi vinnu. Eins langar mig að þakka dómurunum og þeim fyrirtækjum sem styrktu keppnina. Ég er mjög þakklát og ánægð með útkomuna og hvernig allt í kringum keppnina tókst til.