Sameinuðu Þjóðirnar hafa tilnefnt árið 2026 sem "Alþjóðlegt ár kvenbóndans."

Þar sem ég er sjálf kvenbóndi, þá verð ég að gera eitthvað til að heiðra þessa ákvörðun. Þannig að við ákváðum að halda hönnunarsamkeppni. Þar sem prjónarar geta hannað peysu fyrir kvenbændur heimsins, og að sjálfsögðu úr íslenskri ull. Hér má finna helstu upplýsingar um keppnina:

Markmiðið er að hanna íslenska lopapeysu til að heiðra konur sem eru bændur.

Konur eru hryggjarstykkið í sveitum landsins og hafa alltaf verið. Þær hafa staðið að bústörfum, heimilisstörfum, barnauppeldi, ræktun búpenings, grænmetis og blómagarða ásamt því að sinna félagsmálum fyrir landbúnað, kynningu á starfi bænda í sveitum og það er aðeins brot af því sem konur til sveita gera í sínu starfi.

Það er samt svo að í hugum margra hoppar karlmaður upp þegar minnst er á bændur. En bændur eru svo sannarlega bæði konur og menn. Enda tek ég undir orð föður míns sem alltaf sagði; "Konur eru líka menn."

Það er því löngu tímabært að kvenbændur fái þá athygli sem þeir eiga skilið og við í Uppspuna viljum leggja okkar að mörkum til að efla þann heiður.

Og því blásum við til leiks. Höldum hönnunarsamkeppni á lopapeysu fyrir kvenbóndann. Allir geta tekið þátt, en að sjálfsögðu þarf garnið að vera unnið úr íslenskri ull og helst á Íslandi.

Dómarateymið verður valið úr prjónurum sem eru ekki of tengdir Uppspuna (til að gæta hlutleysis)

Reglur

1. Verkefnið er íslensk Lopapeysa.
2. Peysan á að vera fyrir konur.
3. Hún skal gerð úr íslenskri ull.
4. Uppspunagarn væri frábært, en það er ekki skylda. Skylt er að ullin sé íslensk og garnið á helst að vera framleitt á Íslandi.
5. Peysunni og drögum að uppskrift skal skilað til Huldu í Uppspuna fyrir 15. júní 2026. (Uppskriftin þarf ekki að vera fullunnin)
6. Upplýsingar um garnið og hugmyndina að peysunni (hvað liggur að baki hönnunarhugmyndinni) á að fylgja peysunni.
7. Upplýsingar um prjónarann á að fylgja í LOKUÐU UMSLAGI, svo að dómarar viti ekki hver á hvaða peysu.
8. Frekari upplýsingar má fá á netfanginu huldauppspuni@gmail.com
9. Tvær peysur munu fá verðlaun.
   1. Besta peysan
   2. Frumlegasta peysan
10. Peysurnar verða skoðaðar og dæmdar og úrslit tilkynnt 20. júní 2026
11. Að keppni lokinni verður peysunum skilað til hönnuða þeirra.
12. Mögulega munu uppskriftirnar verða gefnar út, en það verður gert í samráði við hönnuðina og ákveðið eftir að úrslit hafa verið kynnt.